អតីតសិស្សសាលាបាក់ទូកមួយក្រុម សម្តែងការសោកស្តាយចំពោះ ការបាត់បង់ អតីតលោកគ្រូភាសាខ្មែរ ជើងចាស់០១រូប!

អតីតសិស្សសាលាបាក់ទូកមួយក្រុម សម្តែងការសោកស្តាយចំពោះ ការបាត់បង់ អតីតលោកគ្រូភាសាខ្មែរ ជើងចាស់០១រូប!

លោកគ្រូ តែត យ៉ន ជាអតីតគ្រូបង្រៀនភាសាខ្មែរ នៅសាលាបាក់ទូក តាំងពីអំឡុងទសវត្សរ៍ឆ្នាំ១៩៨០ បានទទួលមរណៈភាព កាលពីវេលាម៉ោង ០២៖០៧នានីយប់ ឈានចូល ថ្ងៃទី២៨ ខែមេសា ឆ្នាំ២០២៥ ក្នុងជន្មាយុ៨៧ឆ្នាំ ដោយជរាពាធ។ សពត្រូវបានតម្កល់ធ្វើបុណ្យតាមប្រពៃណីព្រះពុទ្ធសាសនា នៅគេហដ្ឋាន ផ្ទះលេខ៣B ផ្លូវទី១ ភូមិដំណាក់ធំ២ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ។

ភ្លាមៗ ក្រោយពេលបានទទួលដំណឹងដ៏ក្រៀមក្រំនេះ នៅព្រឹកថ្ងៃទី២៩ ខែមេសា ឆ្នាំ២០២៥ ក្រុមអតីតមិត្តភក្តិរួមជំនាន់សាលាបាក់ទូក មួយក្រុម រួមជាមួយ អតីតលោកគ្រូ អ្នកគ្រូ បានរួមគ្នាចូលរួមជាថវិកា តាមសទ្ធារៀងៗខ្លួន សរុបចំនួន ១២លានរៀល ប្រគល់ជូនដល់គ្រួសារសព និងបានចូលរួមរំលែកទុក្ខ ព្រមទាំងសូមបួងសួងដល់វិញ្ញាណក្ខន្ធលោកគ្រូ បានទៅកាន់សុគតិភពកុំបីឃ្លៀងឃ្លាតឡើយ។ ក្នុងចំណោមមិត្តរួមជំនាន់ទាំងអស់ ក៏មានលោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស ជាមេបញ្ជាការ កងរាជអាវុធហត្ថរាជធានីភ្នំពេញ បានចូលរួមទាំងថវិកា និងបន្ថែមនូវភេសជ្ជៈចម្រុះ ៨០កេស សម្រាប់ទុកប្រើប្រាស់ក្នុងកម្មវិធីបុណ្យសពលោកគ្រូ ផងដែរ។

កាយវិការ ដ៏គួរឲ្យគោរពរបស់ក្រុមអតីតសិស្សបាក់ទូកមួយនេះ មិនមែនទើបតែមានក្នុងពេលលោកគ្រូអស់ព្រះជន្មនោះទេ គឺតែងតែធ្វើជាប់ជាប្រចាំ ចំពោះអតីតលោកគ្រូអ្នកគ្រូគ្រប់ៗគ្នា ដែលលោកកំពុងនៅមានព្រះជន្ម និងជួយដល់មិត្តរួមជំនាន់ដែលជួបការលំបាកហើយខ្វះលទ្ធភាព មកជាច្រើនឆ្នាំហើយ ស្របតាមពាក្យស្លោករបស់ក្រុម ដែលបានបង្កើតឡើងថា "សាមគ្គីមិត្តភាព បង្កើតចិត្តរមនា ចែករំលែកជួយគ្នា គ្រប់គ្រាលំបាក" ហើយកាយវិកា នាពេលនេះ បានទទួលការថ្លែងអំណរគុណយ៉ាងជ្រាលជ្រៅបំផុត ពីក្រុមគ្រួសារនៃសពផងដែរ ៕

(សូមអានបន្ត)

វិស័យឯកជន ៖ វត្តមានរោងចក្រដំឡើងរថយន្តអគ្គិសនី BYD នៅកម្ពុជា នឹងជំរុញការប្រើប្រាស់កាន់តែច្រើន

 វិស័យឯកជន ៖ វត្តមានរោងចក្រដំឡើងរថយន្តអគ្គិសនី BYD នៅកម្ពុជា នឹងជំរុញការប្រើប្រាស់កាន់តែច្រើន

វិស័យឯកជន មានសុទិដ្ឋិនិយមថា ការប្រើប្រាស់រថយន្តអគ្គិសនីនៅកម្ពុជានឹងហក់ឡើងកាន់តែខ្ពស់ បន្ទាប់ពីក្រុមហ៊ុនផលិតរថយន្តអគ្គិសនីឈានមុខគេរបស់ប្រទេសចិន BYD បានចាប់បើកដំណើរការសាងសង់រោងចក្រដំឡើងរថយន្តអគ្គិសនីនៅប្រទេសកម្ពុជា ដោយគ្រោងនឹងចាប់ផ្តើមដំណើរការដំឡើងជាផ្លូវការនៅដើមខែវិច្ឆិកា ឆ្នាំ២០២៥ខាងមុខ។

រោងចក្រដំឡើងរថយន្តរបស់ក្រុមហ៊ុន ប៊ីវ៉ាយឌី ខេមបូឌា ឯ.ក (BYD Cambodia Co., Ltd.) ដែលប្រារព្ធពិធីបើកការដ្ឋានសាងសង់ក្នុងថ្ងៃទី២៨ ខែមេសា នេះ គឺជាបុត្រសម្ព័ន្ធរបស់ក្រុមហ៊ុន BYD Auto Industry។ 

ក្រុមហ៊ុនមានផែនការបណ្ដាក់ទុនប្រមាណ ៣២ លានដុល្លារសម្រាប់ដំណាក់កាលទី១ លើការបង្កើតរោងចក្រផ្គុំដំឡើងយានយន្តប្រភេទ CKD នៅលើផ្ទៃដីប្រមាណ ១២ហិកតា ក្នុងតំបន់សេដ្ឋកិច្ចពិសេសក្រុងព្រះសីហនុ សម្រាប់ដំឡើងរថយន្តអគ្គិសនីសុទ្ធ(EV) និងអគ្គិសនីលាយសាំង (PHEV)។

រោងចក្រនេះនឹងមានសមត្ថភាពដំឡើងរថយន្តប្រមាណ ១ ម៉ឺនគ្រឿងក្នុងមួយឆ្នាំៗទៅតាមដំណាក់កាល។ រោងចក្រដំឡើងរថយន្ត BYD Cambodia គ្រោងនឹងបញ្ចប់ការសាងសង់នៅខែតុលា និងចាប់ផ្តើមដំណើរការផលិតកម្មដំឡើងរថយន្តអគ្គិសនីជាលើកដំបូងនៅកម្ពុជានាដើមខែវិច្ឆិកា ឆ្នាំ២០២៥។

អគ្គនាយកក្រុមហ៊ុន វិរៈ ប៊ុនថាំ អ៊េចប្រេស ខូអិលធីឌី លោក សួរ វីរៈ បានឱ្យដឹងថា និន្នការនៃការប្រើប្រាស់រថយន្តអគ្គិសនីនៅកម្ពុជានឹងបន្តកើនឡើងឆាប់រហ័ស ស្របពេលការវិនិយោគលើស្ថានីយបញ្ចូលអគ្គិសនីក៏កំពុងកើនឡើងផងដែរលោកថា សម្រាប់ក្រុមហ៊ុនរបស់លោកក៏កំពុងបង្កើនការប្រើប្រាស់រថយន្តអគ្គិសនីនៅក្នុងអាជីវកម្មរបស់ខ្លួនផងដែរ។

លោកមានប្រសាសន៍ថា ៖ «ក្រុមហ៊ុនរបស់យើងមានគោលការណ៍ក្នុងការប្រើប្រាស់រថយន្តអគ្គិសនីឱ្យបានកាន់តែច្រើនបន្ថែមទៀត ដោយ ៨០ភាគរយនៃរថយន្តរបស់ វិរៈ ប៊ុនថាំ ជាប្រភេទរថយន្តអគ្គិសនី ខណៈ​បច្ចុប្បន្នក្រុមហ៊ុនបានសាងសង់នៅក្នុងខេត្តមួយចំនួនរួចហើយ រួមទាំងរាជធានីភ្នំពេញផងដែ ដែលអាចនឹងរួចរាល់នៅក្នុងរយៈពេល ១ ទៅ ២ ខែខាងមុខ»។ 

នៅក្នុងពិធីបើកការដ្ឋានសាងសង់រោងចក្រដំឡើងរថយន្តអគ្គិសនីរបស់ក្រុមហ៊ុន BYD Cambodia នៅកម្ពុជា ដែលមានការចូលរួមពីឯកឧត្តម Wang Wenbin ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំនៅកម្ពុជា និង​ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(CDC) បានសម្តែងនូវការអបអរសាទរ និងវាយតម្លៃខ្ពស់ចំពោះក្រុមហ៊ុន BYD Cambodia សម្រាប់ការសម្រេចចិត្តក្នុងការបណ្តាក់ទុនវិនិយោគនៅកម្ពុជាលើវិស័យយានយន្តអគ្គិសនី  បន្ទាប់ពី ឯកឧត្តម​ និងគណៈប្រតិភូ CDC បានទៅធ្វើទស្សនកិច្ចផ្ទាល់ដល់ទីស្នាក់ការកណ្តាលរបស់ក្រុមហ៊ុន BYD នៅទីក្រុងស៊ិនជិន សាធារណរដ្ឋប្រជាមានិតចិន កាលពីថ្ងៃទី២០ ខែតុលា ឆ្នាំ២០២៣។

ឯកឧត្តម ស៊ុន ចាន់ថុល បានលើកឡើងថា ការវិនិយោគរបស់ BYD Cambodia នៅពេលនេះ គឺជាការរួមចំណែកជួយដល់ការអភិវឌ្ឍសេដ្ឋកិច្ច និងសង្គមកម្ពុជា ពីសំណាក់រដ្ឋាភិបាល និងប្រជាជនចិន តាមរយៈគំនិតផ្តួចផ្តើមខ្សែក្រវ៉ាត់ និងផ្លូវ (BRI) និងបានរំលេចអំពីលទ្ធផលជាផ្លែផ្កានៃទស្សនកិច្ចផ្លូវរដ្ឋរបស់ ឯកឧត្តម​ ស៊ី ជីនពីង ប្រធានាធិបតីនៃសាធារណ​រដ្ឋប្រជាមានិតចិន ដែលស្តែងឱ្យឃើញពីការរួមគ្នាពូនជ្រំថែរក្សា និងបន្តរឹតចំណងមិត្តភាពទំនាក់ទំនងការទូតកម្ពុជា-ចិន ឱ្យកាន់តែមានភាពល្អប្រសើរឡើង ក្នុងនាមជាដៃគូយុទ្ធសាស្ត្រគ្រប់ជ្រុងជ្រោយ និងជាមិត្តដែកថែប រួមទាំងសម្រេចឱ្យបាននូវការកសាងសហគមន៍វាសនារួមកម្ពុជា-ចិន ក្នុងយុគសម័យថ្មី។

ឯកឧត្តមបានបន្ថែមថា៖«គម្រោងវិនិយោគ ក៏ដូចជាវត្តមានរបស់ក្រុមហ៊ុន BYD នៅកម្ពុជា គឺបង្ហាញឱ្យឃើញពីការជឿទុកចិត្តរបស់វិនិយោគិន​មកលើរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប៉ិនប្រសព្វរបស់ប្រមុខដឹកនាំគ្រប់ជំនាន់ រួមជាមួយនឹងការធ្វើ​បរម​ភាវូប​នីយកម្មរបស់ CDC ដែលជាសេនាធិការរបស់រាជរដ្ឋាភិបាលលើការងារវិនិយោគ។ 

CDC បាននិងកំពុងបន្តធ្វើឱ្យប្រសើរឡើងនូវបរិយាកាសធុរកិច្ច និងវិនិយោគ តាមរយៈការជំរុញផ្សព្វផ្សាយនូវច្បាប់ស្ដីពីវិនិយោគ ការគោះទ្វារវិនិយោគនៅក្រៅប្រទេស ព្រមទាំងការធ្វើសាមញ្ញកម្មនីតិវិធីពាក់ព័ន្ធនានា។

ក្រសួងសាធារណការ និងដឹកជញ្ជូន បានឱ្យដឹងថា ចំនួននៃការចុះបញ្ជីយានយន្តអគ្គិសនី(EVs) នៅកម្ពុជាបានកើនឡើងយ៉ាងច្រើន។ ក្នុងឆ្នាំ២០២៤ មានរថយន្ត EV ដែលចុះបញ្ជីសរុបចំនួន ២ ២៥៣ គ្រឿង កើនឡើង ៦២០ ភាគរយបើធៀបនឹងឆ្នាំ២០២៣ ដែលបានចុះបញ្ជីរថយន្ត EV ថ្មីចំនួន ៣១៣ គ្រឿង ហើយម៉ាករថយន្ត EV ដែលពេញនិយមបំផុតនៅក្នុងប្រទេសកម្ពុជា រួមមាន  រថយន្ត BYD, Toyota និង Tesla ជាដើម៕

(សូមអានបន្ត)

ឯកឧត្ដម​ ង៉ូវ​ បូរីណា​ អញ្ជេីញចូលរួមកិច្ចប្រជុំ​កម្រិត​ថ្នាក់​ដឹកនាំ​ពិនិត្យ​ និងផ្ដល់​មតិយោបល់​ណែនាំ​បន្ថែម​លេីផែន​ការ​សកម្មភាព​អាទិភាព​ ២០២៣-២០២៨​ របស់​អគ្គនាយក​ដ្ឋាន​ចំណេះដឹង​ និង​ព័ត៌មាន​បរិស្ថាន

ឯកឧត្ដម​ ង៉ូវ​ បូរីណា​ អញ្ជេីញចូលរួមកិច្ចប្រជុំ​កម្រិត​ថ្នាក់​ដឹកនាំ​ពិនិត្យ​ និងផ្ដល់​មតិយោបល់​ណែនាំ​បន្ថែម​លេីផែន​ការ​សកម្មភាព​អាទិភាព​ ២០២៣-២០២៨​ របស់​អគ្គនាយក​ដ្ឋាន​ចំណេះដឹង​ និង​ព័ត៌មាន​បរិស្ថាន​

ឯកឧត្ដម​ ង៉ូវ​ បូរីណា​ រដ្ឋលេខាធិកា​ក្រសួង​បរិស្ថាន​ អញ្ជើញ​ចូលរួម​កិច្ចប្រជុំ​ស្ដីពី​ កម្រិត​ថ្នាក់​ដឹកនាំ​ពិនិត្យ​ និង​ផ្ដល់​មតិយោបល់​ណែនាំ​បន្ថែម​លេីផែនការសកម្មភាពអាទិភាព​២០២៣-២០២៨​ របស់​អគ្គនាយក​ដ្ឋាន​ចំណេះដឹង​និង​ព័ត៌មាន​បរិស្ថាន​ ក្រោមអធិបតីភាព​ ឯកឧត្ដម​បណ្ឌិត​ អ៊ាង​ សុផល្លែត​ រដ្ឋមន្ត្រី​ក្រសួង​បរិស្ថាន​ នៅ​បន្ទប់​សាលា​ប្រជុំ​ម៉ុកម៉ារ៉េត​ ទី​ស្ដីការ​ក្រសួង​បរិស្ថាន​ រាជធានី​ភ្នំពេញ​ នាព្រឹក​ថ្ងៃ​ទី​២៩​ ខែមេសា​ ឆ្នាំ​២០២៥​​  នឹងមាន​ការអញ្ជេីញចូលរួម​ពី​ថ្នាក់ដឹកនាំ​ជាន់​ខ្ពស់​ក្រសួង​បរិស្ថាន​ មន្រ្តី​ជំនាញ​នៃ​អគ្គនាយកដ្ឋាន​ចំណេះដឹង​ និង​ព័ត៌មាន​បរិស្ថាន​ ជាច្រើន​រូបផងដែរ។

(សូមអានបន្ត)