ស្ពានអាកាស និងផ្លូវក្រោមដី ចោមចៅ តម្លៃ ២២លានដុល្លារ សម្ពោធដាក់ឱ្យប្រើប្រាស់ជាផ្លូវការហើយ។

 ភ្នំពេញ: ថ្ងៃទី៣១ ខែមីនា ឆ្នាំ២០២២ ស្ពានអាកាស និងផ្លូវក្រោមដីចោមចៅ ត្រូវបានដាក់ឱ្យប្រើប្រាស់ជាផ្លូវការហើយ នៅព្រឹកនេះ ក្រោមអធិបតីភាព សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី។

ហេដ្ឋារចនាសម្ព័ន្ធ​ថ្មី​ដែល​បាន​បាក់​កាលពី​ថ្ងៃទី​២៩ ខែមិថុនា ឆ្នាំ​២០១៨ ត្រូវបាន​សាងសង់​ដោយ​ក្រុមហ៊ុន Overseas Cambodia Investment Corporation (OCIC) ដែលជា​ក្រុមហ៊ុន​សំណង់​ក្នុងស្រុក​ក្នុង​រយៈពេល​៣០​ខែ ដោយ​ចំណាយ​ថវិកា​សរុប​ប្រមាណ ២២​លាន​ដុល្លារ​អាមេរិក​។

សម្តេចតេជោ ហ៊ុន សែន បានអបអរសាទរចំពោះរដ្ឋបាលរាជធានីភ្នំពេញ និងប្រជាពលរដ្ឋចំពោះសមិទ្ធិផលថ្មីនេះ ដែលមិនត្រឹមតែជួយសម្រួលដល់ការធ្វើដំណើររបស់ប្រជាពលរដ្ឋប៉ុណ្ណោះទេ ថែមទាំងលើកកំពស់សោភ័ណភាព និងការអភិវឌ្ឍន៍ក្នុងរាជធានីភ្នំពេញផងដែរ។

រាជធានី​ភ្នំពេញ​បច្ចុប្បន្ន​មាន​ស្ពានអាកាស​ចំនួន​៦​៖ ស្ពាន​អាកាស​ក្បាលថ្នល់​បាន​សម្ពោធ​នៅ​ថ្ងៃ​ទី​២៤ ខែមិថុនា ឆ្នាំ​២០១០ ។ ស្ពានអាកាស ៧ មករា ថ្ងៃទី ៦ ខែ មករា ឆ្នាំ ២០១២; ស្ពានអាកាសស្ទឹងមានជ័យ ថ្ងៃទី៣១ ខែកក្កដា ឆ្នាំ២០១៤; ស្ពានអាកាស ៥ មករា ថ្ងៃទី ៥ ខែ មករា ឆ្នាំ ២០១៦; ឈប់ស្ពានអាកាសផ្សារដីហុយ ថ្ងៃទី ០២ ខែ កក្កដា ឆ្នាំ ២០១៨; និង​ស្ពាន​អាកាស​ចោមចៅ​ដែល​ទើប​សម្ពោធ​នៅ​ថ្ងៃ​ទី​៣១ ខែ​មីនា ឆ្នាំ​២០២២។

ស្ពានអាកាសមួយទៀត ប្រវែង ៤៨៣ ម៉ែត្រ ទទឹង ១៥.៨ ម៉ែត្រ និង កម្ពស់ ៥ ម៉ែត្រ ត្រូវបាននិងកំពុងសាងសង់នៅតាមបណ្តោយផ្លូវជាតិលេខ ៥ ក្នុងសង្កាត់ឬស្សីកែវ ខណ្ឌឫស្សីកែវ។

រដ្ឋបាលរាជធានីភ្នំពេញ ក៏គ្រោងនឹងសាងសង់ស្ពានអាកាសថ្មី នៅចំនុចប្រសព្វ Century Plaza ដើម្បីសម្រួលចរាចរណ៍ជូនប្រជាពលរដ្ឋឆ្លងកាត់ផ្លូវ ២០០៤ ក៏ដូចជាមហាវិថីសហព័ន្ធរុស្ស៊ីផងដែរ។ និងផ្លូវ២០១១។ គ្រោងនឹងបើកការដ្ឋានសាងសង់ បន្ទាប់ពីសម្ពោធជាផ្លូវការនូវស្ពានអាកាសចោមចៅ និងផ្លូវក្រោមដី។

(សូមអានបន្ត)

ប្រសាសន៍សំខាន់ៗរបស់សម្តេចតេជោ ហ៊ុន សែន អញ្ជើញសម្ពោធដាក់ឱ្យប្រើប្រាស់ផ្លូវជាតិលេខ៥

  ប្រសាសន៍សំខាន់ៗរបស់សម្តេចតេជោ ហ៊ុន សែន អញ្ជើញសម្ពោធដាក់ឱ្យប្រើប្រាស់ផ្លូវជាតិលេខ៥

(ភ្នំពេញ)៖ នៅព្រឹកថ្ងៃសុក្រ ទី២៥ ខែមីនា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា រួមជាមួយលោកទីប្រឹក្សាសេដ្ឋកិច្ច និងពាណិជ្ជកម្មទូតចិនប្រចាំនៅកម្ពុជា បានអញ្ជើញសម្ពោធដាក់ឱ្យប្រើប្រាស់ផ្លូវជាតិលេខ៥១ ដែលជាផ្លូវមួយខ្សែដ៏សំខាន់ម្រើការដល់ការដឹកជញ្ជូនទំនិញ និងការធ្វើដំណើររបស់ប្រជាពលរដ្ឋ ដោយតភ្ជាប់រវាងផ្លូវជាតិលេខ៤ និងផ្លូវជាតិលេខ៥។

នៅក្នុងឱកាសសម្ពោធនោះ, សម្តេចតេជោ ហ៊ុន សែន បានថ្លែងសុន្ទរកថាសំណេះសំណាលប្រមាណជិត១ម៉ោង ខាងក្រោមជាខ្លឹមសារសំខាន់របស់សម្តេចតេជោ៖

* សម្តេចតេជោ ហ៊ុន សែន បានថ្លែងថា ជាក្តីរីករាយណាស់ដែលព្រឹកថ្ងៃនេះ បានសម្ពោធសមិទ្ធផលផ្លូវជាតិលេខ៥១ ដែលតភ្ជាប់ផ្លូវជាតិលេខ៤ ទៅផ្លូវជាតិលេខ៥។

* សម្តេចតេជោ ហ៊ុន សែន បានថ្លែងថា ផ្លូវជាតិលេខ៥១ គឺជាផ្លូវខ្សែក្រវាត់ភ្នំពេញ ជួយសម្រួលការធ្វើដំណើរដោយមិនចាំបាច់ឆ្លងកាត់រាជធានីភ្នំពេញ។

* សម្តេចតេជោ ហ៊ុន សែន បានថ្លែងថា ផ្លូវជាតិលេខ៥១ ចូលរួមចំណែកយ៉ាងច្រើនសម្រាប់សេដ្ឋកិច្ចសង្គម។

* សម្តេចតេជោ ហ៊ុន សែន បានថ្លែងថា ការសាងសង់ផ្លូវជាតិលេខ៥១ គឺជាព្រះរាជតម្រិះដ៏ច្បាស់លាស់មួយរបស់ព្រះអង្គឌួង ក្នុងការតភ្ជាប់ការធ្វើដំណើរទៅកាន់សមុទ្រ។

* សម្តេចតេជោ ហ៊ុន សែន បានថ្លែងថា ផ្លូវជាតិលេខ៥១នេះ នៅតែជាផ្លូវយុទ្ធសាស្ត្រមួយរបស់រាជរដ្ឋាភិបាលកម្ពុជានាពេលបច្ចុប្បន្ន ក្នុងការតភ្ជាប់ទៅកាន់សមុទ្រ។

* សម្តេចតេជោ ហ៊ុន សែន តាមរយៈតំណាងឯកអគ្គរដ្ឋទូតចិន សូមថ្លែងអំណរគុណរដ្ឋាភិបាល និងប្រជាជនផ្តល់ថវិកាសម្រាប់ការសាងសង់ផ្លូវជាតិលេខ៥១។

* សម្តេចតេជោ ហ៊ុន សែន បានថ្លែងថា កម្ពុជា បានផ្លាស់ប្តូរនយោបាយក្នុងការសាងសង់ផ្លូវពីការសាងសង់ឱ្យបានវែង មកជាការសាងសង់ឱ្យមានកម្រិតគុណភាពខ្ពស់។

* សម្តេចតេជោ ហ៊ុន សែន បានថ្លែងថា មិនមាននរណានឹកស្មានដល់ចំពោះវឌ្ឍនភាពនេះឡើយ។ សមិទ្ធផលនេះមិនមែនធ្លាក់ពីលើមេឃនោះឡើយ។

* សម្តេចតេជោ ហ៊ុន សែន បានថ្លែងថា សមិទ្ធផលរបស់កម្ពុជា បានកើតចេញពីកិច្ចប្រឹងប្រែងក្នុងការបិទបញ្ចប់ភ្លើងសង្គ្រាម និងរកសុខសន្តិភាព។

* សម្តេចតេជោ ហ៊ុន សែន បានថ្លែងថា អាទិភាពចម្បងរបស់កម្ពុជា គឺសុខសន្តិភាព។

* សម្តេចតេជោ ហ៊ុន សែន បានថ្លែងថា មុនពេលមិនទាន់មានសង្គ្រាមមនុស្សម្នាក់ៗសម្បូរបែបក្នុងការនិយាយពីតម្រូវការបែបនេះ ឬបែបនោះ។ តែពេលមានសង្គ្រាម គឺគេផ្តល់អាទិភាពចម្បងសម្រាប់សុខសន្តិភាព។

* សម្តេចតេជោ ហ៊ុន សែន បានលើកជាឧទាហរណ៍សម្រាប់សង្គ្រាមរវាងរុស្ស៉ី និងអ៊ុយក្រែន ដែលពេលនេះប្រជាជន និងប្រធានាធិបតីអ៊ុយក្រែន បានផ្តល់អាទិភាពខ្ពស់ចំពោះសុខសន្តិភាព។

* សម្តេចតេជោ ហ៊ុន សែន បានថ្លែងថា ចក្ខុវិស័យរក្សាសុខសន្តិភាព ត្រូវបានសម្តេចប្រកាន់ខ្ជាប់រហូតមក។ សម្តេចតេជោ បន្ថែមថា ទោះបីក្នុងលក្ខខណ្ឌណាក៏ដោយ គឺត្រូវរួមគ្នារក្សាឱ្យបាននូវសុខសន្តិភាព។

* សម្តេចតេជោ ហ៊ុន សែន បានថ្លែងថា សមិទ្ធផលផ្លូវជាតិលេខ៥១ កើតចេញពីកិច្ចសហប្រតិបត្តិការល្អរវាងកម្ពុជា និងចិន។

* សម្តេចតេជោ ហ៊ុន សែន បានថ្លែងថា កិច្ចសហប្រតិបត្តិការវាងកម្ពុជា និងចិន កំពុងនាំហុចផ្លែផ្កាជាច្រើនទាំងការអភិវឌ្ឍ ការធ្វើពាណិជ្ជកម្ម និងការវិនិយោគ។

* សម្តេចតេជោ ហ៊ុន សែន បានថ្លែងថា ជំងឺកូវីដ១៩ មិនអាចរារាំងដំណើរការអភិវឌ្ឍរបស់កម្ពុជានោះឡើយ។ ក្នុងនោះគម្រោងនានារបស់ចិន មិនមានផ្អាកសកម្មភាពនោះឡើយ។

* សម្តេចតេជោ ហ៊ុន សែន ផ្តាំទៅអភិបាលខេត្តកំពង់ឆ្នាំង និងកំពង់ស្ពឺ ប្រយ័ត្នទៅមិនដល់ព្រំដែនខេត្ត នាំឱ្យក្លាយជាជម្រកគ្រឿងញៀន។

* សម្តេចតេជោ ហ៊ុន សែន បានថ្លែងថា នាយករដ្ឋមន្ត្រីជប៉ុន ជឿលើព្រហ្មលិខិតផងដែរ។ សម្តេចតេជោ ហ៊ុន សែន បានបញ្ជាក់ក្នុងពិសារអាហារជាមួយគ្នា នាយករដ្ឋមន្ត្រីជប៉ុន បានលើកឡើងព្រហ្មលិខិតកំណត់ឱ្យធ្វើជានាយករដ្ឋមន្ត្រី។

* សម្តេចតេជោ ហ៊ុន សែន បានថ្លែងថា គួរតែជឿងលើព្រហ្មលិខិតខ្លះទៅ។ បើព្រហ្មលិខិតមិនកំណត់ ទោះប៉ងប៉ុណ្ណាក៏មិនបានដែរ។

* សម្តេចតេជោ ហ៊ុន សែន បានថ្លែងថា សម្តេចមានបំណងធ្វើត្រឹមគ្រូបង្រៀន និងអ្នកបើកយន្តហោះប៉ុណ្ណោះ តែព្រហ្មលិខិតបានកំណត់ឱ្យសម្តេចធ្វើជានាយករដ្ឋមន្ត្រី។

* សម្តេចតេជោ ហ៊ុន សែន បានរំលឹកថា សម្តេចជាអ្នកដែលបានកាន់តំណែងរដ្ឋមន្ត្រីការបរទេស និងធ្វើជានាយករដ្ឋមន្ត្រី ក្នុងអាយុក្មេងជាងគេ។

* សម្តេចតេជោ ហ៊ុន សែន បានថ្លែងថា អាយុមិនសំខាន់នោះទេ តែសំខាន់ធ្វើបាន ឬមិនបាន។

* សម្តេចតេជោ ហ៊ុន សែន បានថ្លែងថា ក្មេងមានចំណេះដឹង ខ្វះបទពិសោធន៍ ចាស់ខ្វះចំណេះដឹង តែសម្បូរណ៍ពិសោធន៍។

* សម្តេចតេជោ ហ៊ុន សែន បានថ្លែងថា ក្មេងមិនត្រូវមើលងាយចាស់ ហើយចាស់មិនត្រូវមើលងាយក្មេង។

* សម្តេចតេជោ ហ៊ុន សែន បានថ្លែងថា នៅពេលសម្តេចលាឈប់ពីតំណែងនាយករដ្ឋមន្ត្រី គឺសម្តេចមិនទាមទារឱ្យអ្នកបន្តវេនមកសួរ ឬឆ្លងយោបល់ពីសម្តេចនោះឡើយ។

* សម្តេចតេជោ ហ៊ុន សែន បានថ្លែងថា ឆ្នាំ២០២៣ សម្តេចនៅតែបន្តឈរជាបេក្ខភាពនាយករដ្ឋមន្ត្រីមកពីគណបក្សប្រជាជនកម្ពុជា។

* សម្តេចតេជោ ហ៊ុន សែន បានថ្លែងថា ក្នុងឱកាសបុណ្យចូលឆ្នាំថ្មី សម្តេចនឹងសម្រាកលំហែនៅខេត្តព្រះសីហនុ។

* សម្តេចតេជោ ហ៊ុន សែន បានថ្លែងថា ខំបង្កើតក្រសួង បង្កើតស្ថាប័ន តែមិនព្រមធ្វើ។

* សម្តេចតេជោ ហ៊ុន សែន បានថ្លែងដាក់បទបញ្ជាដល់អាជ្ញាធរ និងសមត្ថកិច្ច រៀបចំរក្សាសន្តិសុខ ដើម្បីបង្កលក្ខណៈសប្បាយរីករាយជូនប្រជាពលរដ្ឋក្នុងឱកាសបុណ្យចូលឆ្នាំថ្មី។

(សូមអានបន្ត)

 

សម្ដេចក្រឡាហោម អញ្ជើញបិទសន្និបាទបូកសរុបលទ្ធផលការងារប្រចាំឆ្នាំ២០២១ និងលើកទិសដៅការងារឆ្នាំ២០២២

 បាត់ដំបង: ថ្ងៃទី១១ ខែមីនា ឆ្នាំ២០២២ នៅព្រឹកថ្ងៃ៨កើត ខែផល្គុន ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃព្រហស្បតិ៍ ទី១០ ខែមីនា ឆ្នាំ២០២២ សម្ដេចក្រឡាហោម ស ខេង ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូល ដ្ឋានខេត្តបាត់ដំបង បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២១ និងលើកទិសដៅការងារឆ្នាំ២០២២ របស់រដ្ឋបាលខេត្តបាត់ដំបង ដោយមានការអញ្ជើញចូលរួមពីឯកឧត្តម លោកជំទាវ សមាជិក សមាជិករដ្ឋសភា និងព្រឹទ្ធសភា ឯកឧត្តម លោកជំទាវ ប្រធាន អនុប្រធាន ក្រុមការងាររាជរដ្ឋាភិបាលចុះមូលដ្ឋាន ខេត្ត ក្រុង ស្រុក ឃុំ សង្កាត់ ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ និងប្រធានអង្គភាព តំណាងអង្គភាពនានា ។

ក្នុងឱកាសនោះ សម្ដេចក្រឡាហោម ស ខេង ឧបនាយករដ្ឋមន្រ្ដី រដ្ឋមន្រ្ដីក្រសួងមហា ផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង បានមានប្រសាសន៍ថ្លែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្ត្រីរាជការ កងកម្លាំងមានសមត្ថកិច្ចនានា និងក្រុមការងាររាជរដ្ឋាភិបាលចុះមូលដ្ឋានគ្រប់លំដាប់ថ្នាក់ នៃខេត្តបាត់ដំបង ដែលបានខិតខំប្រឹងប្រែងរួមគ្នាយ៉ាងសកម្ម ក្នុងការបំពេញតួនាទីភារកិច្ច ប្រកបដោយស្មារតីទទួលខុសត្រូវខ្ពស់ ដើម្បីសម្រេចបាននូវសមិទ្ធផលក្នុងការធានាថែរក្សាសុខសន្តិភាព ស្ថិរភាពនយោបាយ ការរក្សាសន្តិសុខ សណ្តាប់ធ្នាប់សាធារណៈ ការលើកកម្ពស់លទ្ធិប្រជាធិបតេយ្យ និងជំរុញការអភិវឌ្ឍសេដ្ឋកិច្ច-សង្គម ស្របតាមគោលនយោបាយរបស់រាជរដ្ឋាភិបាល សំដៅលើកកម្ពស់ជីវភាពរស់នៅ និងបន្តកាត់បន្ថយភាពក្រីក្ររបស់ប្រជាពលរដ្ឋ ។ ក្នុងនោះបានខិតខំចូលរួមក្នុងការដោះស្រាយជីវភាពរបស់ប្រជាពលរដ្ឋ ដែលទទួលរងនូវផលប៉ះពាល់ពីវិបត្តិនៃជំងឺកូវីដ-១៩ ការដោះស្រាយក្តីកង្វល់ សំណើ សំណូមពរ និងបញ្ហាប្រឈមនានានៅមូលដ្ឋានបានជាបន្តបន្ទាប់ ។ ជាពិសេសការចូលរួមទប់ស្កាត់ និងការប្រយុទ្ធប្រឆាំងការឆ្លងរីករាលដាលនៃជំងឺកូវីដ-១៩ ព្រមទាំងចូលរួមជំរុញ និងគាំទ្រដល់ដំណើរការចាក់វ៉ាក់សាំងជូន មន្ត្រីរាជការ កងកម្លាំងមានសមត្ថកិច្ច និងប្រជាពលរដ្ឋទូទាំងខេត្តបាត់ដំបង ផ្អែកតាមយុទ្ធសាស្ត្រចាក់វ៉ាក់សាំងរបស់រាជរដ្ឋាភិបាល ដើម្បីបង្កើតភាពស៊ាំក្នុងសហគមន៍ បង្កើតឱកាសក្នុងការបើកដំណើរការប្រទេសបានពេញលេញ លើគ្រប់វិស័យ ។

សម្តេចក្រឡាហោម ស ខេង ក៏បានមានប្រសាសន៍ ផ្តល់នូវគោលការណ៍ណែនាំជាគន្លឹះសំខាន់មួយចំនួនទៀតដល់អង្គសន្និបាត គឺ ទី១- ការពង្រឹងសន្តិភាព ស្ថិរភាពនយោបាយនិងសន្តិសុខសណ្តាប់ធ្នាប់សាធារណៈ ។ ទី២- ការអនុវត្តន៍វិមជ្ឈការ និងវិសហមជ្ឈការ ។ ទី៣- ការគ្រប់គ្រងធនធានធម្មជាតិ និងការដោះស្រាយវិវាទដីធ្លី ។ ទី៤- ការគ្រប់គ្រងការពារសន្តិសុខ និងការអភិវឌ្ឍតំបន់ព្រំដែន ។ ទី៥- ការអភិវឌ្ឍសេដ្ឋកិច្ច សង្គម និងទីក្រុង ។ ទី៦- ការរៀបចំប្រព័ន្ធផែនការ និងការពង្រឹងប្រព័ន្ធគណនេយ្យភាពសង្គម ។ ទី៧- ការផ្តល់សេវាសាធារណៈ និងការដោះស្រាយបញ្ហាប្រឈមនៅមូលដ្ឋាន ។ ទី៨- ពង្រឹងការអនុវត្តវិធានការនានា ដើម្បីប្រយុទ្ធប្រឆាំងទប់ស្កាត់នឹងជំងឺកូវីដ-១៩ ។ ទី៩- ការពង្រឹងរបៀបរបបការងារ ៕ ដោយ ណយ នឿន (ប្រភព:រដ្ឋបាលខេត្តបាត់ដំបង) សម្រួលផ្សាយដោយ៖ dara

(សូមអានបន្ត)

រដ្ឋបាលខេត្តកណ្ដាល បើកកិច្ចប្រជុំគណៈអភិបាលខេត្ត ប្រចាំខែកុម្ភៈ

រដ្ឋបាលខេត្តកណ្ដាល បើកកិច្ចប្រជុំគណៈអភិបាលខេត្ត ប្រចាំខែកុម្ភៈ

 កណ្តាល: ថ្ងៃទី១១ ខែមីនា ឆ្នាំ២០២២ នៅសាលាខេត្តកណ្តាល ថ្ងៃ៨កើត ខែផល្គុន ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃព្រហស្បតិ៍ ទី១០ ខែមីនា ឆ្នាំ២០២២ រដ្ឋបាលខេត្តកណ្ដាល បានបើកកិច្ចប្រជុំគណៈអភិបាលខេត្ត ប្រចាំខែកុម្ភៈ ឆ្នាំ២០២២ ក្រោមអធិបតីភាពឯកឧត្តម គង់ សោភ័ណ្ឌ អភិបាលខេត្តកណ្ដាល ពាក់ព័ន្ធនឹងការងារសន្តិសុខ សណ្ដាប់ធ្នាប់ និង អាជ្ញាធរក្រុង-ស្រុក ទាំង១១របស់ខេត្ត ។ 

 ក្នុងឱកាសនោះ ឯកឧត្តម គង់ សោភ័ណ្ឌ អភិបាលខេត្តកណ្ដាល បានណែនាំដល់មន្ត្រីជំនាញពាក់ព័ន្ធ និងអាជ្ញាធរក្រុង-ស្រុកទាំង១១ ត្រូវបម្រើសេវារដ្ឋបាល សេវាសាធារណៈឱ្យបានល្អ និងរក្សាសន្តិសុខ សណ្តាប់ធ្នាប់ ធានាសុវត្ថិភាពជូនប្រជាពលរដ្ឋនៅក្នុងមូលដ្ឋាន ឱ្យកាន់តែមានលក្ខណៈល្អប្រសើរឡើងថែមទៀត។ ឯកឧត្តម បានស្នើឱ្យគ្រប់បណ្ដាក្រុង-ស្រុក កម្លាំងមានសមត្ថកិច្ចគ្រប់លំដាប់ថ្នាក់ទាំងអស់ ត្រូវបន្តខិតខំពង្រឹងយន្តការភូមិ ឃុំ មានសុវត្ថិភាពឱ្យកាន់តែមានប្រសិទ្ធភាពខ្ពស់ថែមទៀត ។

 កម្លាំងសមត្ថកិច្ចត្រូវសហការគ្នាឱ្យបានស្អិតល្មួត ខិតខំធ្វើការងារឱ្យបានសកម្ម ដើម្បីឱ្យបទល្មើសនានាមានការថយចុះ។ ក្នុងកិច្ចប្រជុំនេះដែរ ឯកឧត្តម អភិបាលខេត្ត ក៏បានថ្លែងនូវការកោតសរសើរដល់អាជ្ញាធរក្រុង-ស្រុក មន្ទីរពាក់ព័ន្ធ និងកងកម្លាំងទាំងអស់ ដែលបានខិតខំសហការគ្នា ក្នុងការបង្ការ ទប់ស្កាត់ ដោះស្រាយបទល្មើសនានាទទួលបានលទ្ធផលយ៉ាងល្អប្រសើរ ។ 

អាជ្ញាធរនៅមូលដ្ឋានត្រូវបន្តអនុវត្តបទបញ្ជា និងការណែនាំរបស់ខេត្ត និងថ្នាក់ដឹកនាំឱ្យមានប្រសិទ្ធភាពថែមមួយកម្រិតទៀត។ បន្ថែមពីលើនេះ ឯកឧត្តមអភិបាលខេត្ត បានលើកទឹកចិត្តដល់អាជ្ញាធរមូលដ្ឋាន ត្រូវបំផុសឱ្យប្រជាពលរដ្ឋចូលរួមអនុវត្តវិធានការអនាម័យ តាមការណែនាំរបស់ក្រសួងសុខាភិបាល ពិសេសត្រូវអនុវត្តវិធានការ ៣ការពារ និង៣កុំ តាមការអំពាវនាវរបស់សម្ដេចតេជោ ហ៊ុន សែន ប្រមុខរាជរដ្ឋាភិបាល ឱ្យបានខ្ជាប់ខ្ជួន ។ 

 ឯកឧត្តម គង់ សោភ័ណ្ឌ ក៏បានក្រើនរម្លឹកដល់មន្ទីរពាក់ព័ន្ធ ត្រូវគិតគូរពីបញ្ហាសំរាមដោយត្រូវណែនាំដល់បងប្អូនកម្មករ ក៏ដូចប្រជាពលរដ្ឋក្នុងមូលដ្ឋាន ឱ្យចូលរួមសហការដោយប្តូរឥរិយាបថ ពីការ បោះសម្រាមពាសវាលពាសកាល មកបោះចោលសំរាមចូលក្នុងធុងសំរាម និងទុកដាក់សំរាមឱ្យបានត្រឹមត្រូវ ដើម្បីធ្វើខេត្តរបស់យើងមានសោភណ្ឌភាពស្អាត និង មាន បរិស្ថានល្អជានិច្ច ៕ ដោយ ណយ នឿន (ប្រភព:រដ្ឋបាលខេត្តកណ្តាល) សម្រួលផ្សាយដោយ៖ dara

 

(សូមអានបន្ត)

រដ្ឋបាលខេត្តព្រះសីហនុ រៀបចំពិធីក្រុងពលី បញ្ចុះបឋមសិលាសាងសង់អគាររដ្ឋបាលសាលាខេត្តថ្មី

 ព្រះសីហនុ: ថ្ងៃទី០៧ ខែមីនា ឆ្នាំ២០២២​

ព្រឹកថ្ងៃចន្ទ ៥កើត ខែផល្គុន ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី០៧ ខែមីនា ឆ្នាំ២០២២ ឯកឧត្តម សូរ ជុង ហួរ ប្រធានក្រុមប្រឹក្សាខេត្តព្រះសីហនុ និងឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ អញ្ជើញចូលរួមក្នុងពិធីក្រុងពលីបញ្ចុះបឋម សិលាសាងសង់អគាររដ្ឋបាលសាលាខេត្តព្រះសីហនុថ្មីនៅលើទីតាំងចាស់ ស្ថិតនៅក្នុង សង្កាត់លេខ៣ ក្រុង ខេត្តព្រះសីហនុ និងមានការចូលរួមពីឯកឧត្តមអនុរដ្ឋលេខាធិការ ក្រសួងដែនដីនគរូបនីយកម្ម និងសំណង់ ឯកឧត្តមសមាជិកក្រុមប្រឹក្សាខេត្ត លោកអភិ បាលរងខេត្ត លោកនាយក នាយករងរដ្ឋបាលសាលាខេត្ត អភិបាលក្រុងស្រុក និងប្រធាន មន្ទីរអង្គភាពពាក់ព័ន្ធជុំវិញខេត្ត។​

សូមបញ្ជាក់ថា អគាររដ្ឋបាលសាលាខេត្តព្រះសីហនុថ្មីនេះ សាងសង់លើផ្ទៃ ក្រឡាសរុប ៤៤,០៩៣ម៉ែត្រការ៉េ ដែលមានកម្ពស់ ៤ជាន់ គ្រោងសាងសង់ដោយ ប្រើរយៈពេល ១៨ខែ តាមរចនាបទខ្មែរ ជាអគារមួយមានលក្ខណៈទំនើប និងស៊ីវិល័យ នាពេលខាងមុខ ស្របតាមការអភិវឌ្ឍរបស់ខេត្តព្រះសីហនុ ៕

(សូមអានបន្ត)

ភាពតានតឹងរវាងរុស្ស៊ី និងអ៊ុយក្រែនទំនងជាប៉ះពាល់ដល់ការផ្គត់ផ្គង់ស្រូវសាលីរបស់ឥណ្ឌូណេស៊ី

 

ភ្នំពេញ:ថ្ងៃទី០៤ ខែមីនា ឆ្នាំ២០២២  ការផ្គត់ផ្គង់ស្រូវសាលីរបស់ប្រទេសឥណ្ឌូណេស៊ីអាចនឹងរងផលប៉ះពាល់ដោយសារជម្លោះរវាងរុស្ស៊ី និងអ៊ុយក្រែនដែលកំពុងបន្ត ដោយសារប្រទេសនេះពឹងផ្អែកខ្លាំងទៅលើការនាំចូលស្រូវសាលីពីអ៊ុយក្រែន។

យោងតាមមជ្ឈមណ្ឌល Think Tank សម្រាប់ការសិក្សាយុទ្ធសាស្ត្រ និងអន្តរជាតិ (CSIS) បានឱ្យដឹងថា ប្រទេសទាំងពីរប្រហែលជាមិនមែនជាដៃគូពាណិជ្ជកម្មដ៏សំខាន់របស់ឥណ្ឌូណេស៊ីសម្រាប់ការនាំចូល ឬនាំចេញនោះទេ។ ប៉ុន្តែជម្លោះនេះនឹងជះឥទ្ធិពលដល់ការនាំចូលគ្រឿងផ្សំអាហាររបស់ឥណ្ឌូណេស៊ី ជាពិសេសស្រូវសាលីអ៊ុយក្រែន។

លោក Lestary J. Barany ជំនួយការស្រាវជ្រាវមួយរូបនៅនាយកដ្ឋានសេដ្ឋកិច្ចរបស់ CSIS បាននិយាយថា ប្រមាណ ៧៥ភាគរយនៃការនាំចូលរបស់ប្រទេសឥណ្ឌូណេស៊ីពីអ៊ុយក្រែន គឺជាគ្រាប់ធញ្ញជាតិ រួមទាំងស្រូវសាលីផងដែរ បន្ទាប់មក គឺដែក និងដែកថែប ២៣ភាគរយ និងទំនិញផ្សេងៗទៀត ២ភាគរយ។

អ៊ុយក្រែន គឺជាអ្នកផ្គត់ផ្គង់ស្រូវសាលីធំជាងគេរបស់ប្រទេសឥណ្ឌូណេស៊ី ដែលជាធាតុផ្សំសំខាន់សម្រាប់ក្រុមហ៊ុនធ្វើគុយទាវ ម្ស៉ៅ និងនំប៉័ង។ ប៉ុន្តែឃ្លាំងស្រូវសាលីជាច្រើនរបស់វាស្ថិតនៅតំបន់ភាគខាងកើត ដែលស្ថិតនៅជិតនឹងកន្លែងដែលទាហានរុស្ស៊ីត្រូវបានគេដាក់ពង្រាយ។ លោក Lestary បាននិយាយបន្ថែមថា ដូច្នេះការគំរាមកំហែងទៅលើផ្នែកផ្គត់ផ្គង់អាចនឹងមានការកើនឡើងកាន់តែខ្លាំងឡើង៕(ប្រភព VNA បកប្រែដោយលោក យា ចិន្តាខន្តី) សម្រួលផ្សាយដោយ៖ dara

(សូមអានបន្ត)

សហភាពអឺរ៉ុបដាក់ការរឹតបន្តឹងបន្ថែមទៀតទៅលើបេឡារុស្សជុំវិញជម្លោះរវាងរុស្ស៊ី-អ៊ុយក្រែន

 

ភ្នំពេញ៖ ថ្ងៃទី០៤ ខែមីនា ឆ្នាំ២០២២  ក្រុមប្រឹក្សាសហភាពអឺរ៉ុប (EU) បានដាក់ចេញនូវទណ្ឌកម្មទៅលើបុគ្គលចំនួន ២២នាក់បន្ថែមទៀត និងការរឹតបន្តឹងបន្ថែមទៀតទៅលើពាណិជ្ជកម្មប្រឆាំងនឹងបេឡារុស្ស ជុំវិញតួនាទីរបស់ខ្លួននៅក្នុងជម្លោះរវាងរុស្ស៊ី និងអ៊ុយក្រែន។

ក្រុមប្រឹក្សានេះបាននិយាយនៅក្នុងសេចក្តីថ្លែងការណ៍មួយថា ខ្លួនបានសម្រេចចិត្តដាក់ចេញនូវវិធានការរឹតបន្តឹងដោយមានគោលដៅទៅលើសកម្មភាពបំផ្លាញ ឬការគំរាមកំហែងដល់បូរណភាពទឹកដី អធិបតេយ្យភាព និងឯករាជ្យភាពរបស់អ៊ុយក្រែន។

ទណ្ឌកម្មទាំងនេះត្រូវបានដាក់ចេញប្រឆាំងនឹងសមាជិកជាន់ខ្ពស់ចំនួន ២២នាក់នៃបុគ្គលិកយោធាបេឡារុស្ស ដោយមើលឃើញពីតួនាទីរបស់ពួកគេនៅក្នុងការសម្រេចចិត្ត និងដំណើរការរៀបចំផែនការយុទ្ធសាស្រ្តដែលនាំឱ្យមានការចូលរួមរបស់បេឡារុស្សក្នុងការឈ្លានពានរបស់រុស្ស៊ីប្រឆាំងនឹងអ៊ុយក្រែន។

ក្រុមប្រឹក្សាសហភាពអឺរ៉ុបបានចុះបញ្ជីសមាជិកយោធាបេឡារុស្សចំនួន ២០នាក់រួចហើយនៅក្នុងបរិបទដូចគ្នានេះកាលពីក្នុងខែកុម្ភៈ។

លោក Josep Borrell អ្នកតំណាងជាន់ខ្ពស់នៃសហភាពអឺរ៉ុបសម្រាប់កិច្ចការបរទេស និងគោលនយោបាយសន្តិសុខបាននិយាយថា «ជាមួយនឹងវិធានការទាំងនេះ យើងកំពុងកំណត់គោលដៅទៅលើអ្នកនៅក្នុងប្រទេសបេឡារុស្សដែលសហការជាមួយនឹងការវាយប្រហារទាំងនេះប្រឆាំងនឹងអ៊ុយក្រែន និងការដាក់ការរឹតបន្តឹងពាណិជ្ជកម្មក្នុងវិស័យសំខាន់ៗមួយចំនួន»។

នៅក្នុងសេចក្តីថ្លែងការណ៍បាននិយាយថា ក្រុមប្រឹក្សានេះក៏បានណែនាំផងដែរនូវការដាក់ចេញវិធានការរឹតបន្តឹងបន្ថែមទៀតនៅក្នុងពាណិជ្ជកម្មទំនិញដែលប្រើសម្រាប់ផលិត ឬផលិតផលិតផលថ្នាំជក់ ឥន្ធនៈរ៉ែ សារធាតុកាកប្រេងកាត និងផលិតផលឧស្ម័នអ៊ីដ្រូកាបូន ផលិតផលប៉ូតាស្យូមក្លរួ ផលិតផលឈើ ផលិតផលស៊ីម៉ងត៍ ផលិតផលដែក និងដែកថែប និងផលិតផលកៅស៊ូ។

វាបាននិយាយថា វិធានការរឹតបន្តឹងបន្ថែមទៀតក៏ត្រូវបានដាក់ចេញទៅលើការនាំចេញទំនិញ និងបច្ចេកវិទ្យាប្រើប្រាស់ទ្វេរដង ព្រមទាំងទំនិញ និងបច្ចេកវិទ្យាទំនើបមួយចំនួនដែលអាចរួមចំណែកដល់ការអភិវឌ្ឍផ្នែកយោធា បច្ចេកវិទ្យា ការពារជាតិ និងសន្តិសុខរបស់ប្រទេសបេឡារុស្ស រួមជាមួយនឹងការរឹតបន្តឹងទៅលើការផ្តល់សេវាពាក់ព័ន្ធនានាផងដែរ៕(ប្រភព People’s Daily បកប្រែដោយលោក យា ចិន្តាខន្តី) សម្រួលផ្សាយដោយ៖ ធូ កុសល

(សូមអានបន្ត)

ក្រសួងពាណិជ្ជកម្មរៀបចំសិក្ខាសាលាពិគ្រោះយោបល់ស្តីពី “វឌ្ឍនភាព និងសក្តានុពលរបស់វិស័យស្វាយចន្ទីកម្ពុជា”

ភ្នំពេញោះ ថ្ងៃទី០៤ ខែមីនា ឆ្នាំ២០២២ ឯកឧត្តម រាជ រ៉ា រដ្ឋលេខាធិការក្រសួងពាណិជ្ជកម្ម និងជាអនុប្រធានក្រុមការងារចម្រុះរៀបចំគោលនយោបាយស្វាយចន្ទីកម្ពុជា បានអញ្ជើញជាអធិបតីក្នុងសិក្ខាសាលាស្តីពី “វឌ្ឍនភាព និងសក្តានុពលរបស់វិស័យស្វាយចន្ទីកម្ពុជា” តាមប្រព័ន្ធវីដេអូ ដែលរៀបចំឡើងដោយក្រសួងពាណិជ្ជកម្ម កាលពីថ្ងៃ១កើត ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃព្រហស្បតិ៍ ទី០៣ ខែមីនា ឆ្នាំ២០២២។

នៅក្នុងឱកាសនោះ ឯកឧត្តមរដ្ឋលេខាធិការ បានសម្តែងការស្វាគមន៍ និងមានប្រសាសន៍អំពីសារបាន និងគោលបំណងសំខាន់នៃសិក្ខាសាលា ក៏ដូចជាវឌ្ឍនភាព និងសក្តានុពលនៃវិស័យស្វាយចន្ទីកម្ពុជា ព្រមទាំងលើកឡើងអំពីបញ្ហាប្រឈមមួយចំនួនដែលវិស័យនេះកំពុងជួបប្រទះ ដើម្បីជាមូលដ្ឋានក្នុងការពិគ្រោះយោបល់ និងប្រមូលធាតុចូលបំពេញបន្ថែម ឱ្យបានគ្រប់ជ្រុងជ្រោយនូវវឌ្ឍនភាពថ្មីៗ សម្រាប់ការរៀបចំសេចក្តីព្រាងគោលនយោបាយជាតិ ស្តីពីស្វាយចន្ទី មុននឹងដាក់ជូនគណៈរដ្ឋមន្ត្រី។

ទន្ទឹមនឹងនេះ ឯកឧត្តមរដ្ឋលេខាធិការ បានវាយតម្លៃខ្ពស់ចំពោះកិច្ចខិតខំប្រឹងប្រែង និងការចូលរួមយ៉ាងសកម្មពីមន្ត្រីជំនាញ និងវិស័យឯកជនពាក់ព័ន្ធ ក្នុងការចែករំលែកព័ត៌មាន បទពិសោធន៍អនុវត្តការងារ និងកិច្ចសហការល្អកន្លងមក និងមានជំនឿយ៉ាងមុត មាំថា ក្រសួង ស្ថាប័នពាក់ព័ន្ធ ដៃគូអភិវឌ្ឍន៍ និងវិស័យឯកជន បន្តសហការ និងចូលរួមពន្លឿនការងាររៀបចំសេចក្តីព្រាងគោលនយោបាយជាតិ ស្តីពីស្វាយចន្ទី២០២២-២០២៧ ដើម្បីទទួលបានការអនុម័តពីរាជរដ្ឋាភិបាលក្នុងពេលឆាប់ៗខាងមុខ។

ជាមួយគ្នានេះដែរ តំណាងក្រសួង ស្ថាប័នពាក់ព័ន្ធ ជាពិសេសក្រសួងកសិកម្ម រុក្ខាប្រមាញ់ និងនេសាទ និងអគ្គនាយកដ្ឋានគយ និងរដ្ឋាករកម្ពុជា បានគូសបញ្ជាក់អំពីរបាយការណ៍សង្ខេប អំពីវឌ្ឍនភាពនៃវិស័យស្វាយចន្ទីកម្ពុជា។

ដោយឡែក តំណាងសមាគមស្វាយចន្ទីកម្ពុជា និងវិស័យឯកជនពាក់ព័ន្ធ បានស ម្តែងការគាំទ្រ ក្នុងការរៀបចំសេចក្តីព្រាងគោលនយោបាយជាតិ ស្តីពីស្វាយចន្ទី ព្រមទាំងបានចូលរួមផ្តល់ជាធាតុចូល និងពិភាក្សាផ្លាស់ប្តូរយោបល់យ៉ាងផុលផុស ពាក់ព័ន្ធលើសក្តានុពល ទីផ្សារ ទិន្នន័យរបស់វិស័យស្វាយចន្ទីកម្ពុជា និងបញ្ហាប្រឈមពីវិបត្តិជំងឺកូវីដ-១៩ ជាដើម៕ ដោយ ទេស ច័ន្ទសុធារី (ប្រភព៖ ក្រសួងពាណិជ្ជកម្ម) សម្រួលផ្សាយដោយ៖ ធូ កុសល

(សូមអានបន្ត)

BREAKING: អ៊ុយក្រែន ថារោងចក្រថាមពលនុយក្លេអ៊ែរ Zaporizhzhia ត្រូវបានអគ្គិភ័យឆាបឆេះ ក្រោយការវាយប្រហារពីកងទ័ពរុស្ស៊ី

 (កៀវ)៖ អាជ្ញាធរអ៊ុយក្រែន បានឱ្យដឹ ងថារោងចក្រថាមពលនុយក្លេអ៊ែរ ហ្សាប៉ូរីសហ្ស៊ីយ៉ា (Zaporizhzhia) បាន និងកំពុងត្រូវបានអគ្គីភ័យឆាបឆេះ នៅព្រឹកថ្ងៃសុក្រនេះ បន្ទាប់ពីការវាយប្រហាររបស់កងទ័ពរុស្ស៊ី។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃសុក្រ ទី៤ ខែមីនា ឆ្នាំ២០២២។

ថ្លែងនៅក្នុងសារមួយបង្ហោះលើ Twitter រដ្ឋមន្ត្រីការបរទេសអ៊ុយក្រែន លោក ឌីមីត្រូ គូលេបា (Dmytro Kuleba) បានបញ្ជាក់ដូច្នេះថា «កងទ័ពរុស្ស៊ី កំពុងបើកការវាយប្រហារចេញពីគ្រប់ទិស លើរោងចក្រ Zaporizhzhia ដែលជារោងចក្រថាមពលនុយក្លេអ៊ែរធំបំផុតនៅក្នុងតំបន់អឺរ៉ុប។ អគ្គីភ័យកំពុង ឆាបឆេះរួចទៅហើយ»។

បើតាមអាជ្ញាធរអ៊ុយក្រែន ក្រុមអ្នកពន្លត់អគ្គិភ័យមិនទាន់អាចធ្វើប្រតិបត្តិការរបស់ពួកគេបានឡើយទេ ខណៈកងទ័ពរុស្ស៊ីនៅតែបន្តការវាយប្រហារ៕

(សូមអានបន្ត)

ព្រះករុណា ព្រះមហាក្សត្រ និងសម្ដេចព្រះមហាក្សត្រីយាងទៅពិនិត្យព្រះរាជសុខភាព នៅសាធារណរដ្ឋប្រជាមានិតចិន

 ភ្នំពេញ៖ ថ្ងៃទី០៤ ខែមីនា ឆ្នាំ២០២២​​ ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដី ថ្លៃថ្នូរ និងសុភមង្គល ព្រះអង្គទាំងទ្វេ បានសព្វព្រះរាជហឬទ័យស្ដេចយាងចាកចេញពីកម្ពុជាហើយ នាព្រឹកថ្ងៃទី០៤ ខែមីនាឆ្នាំ២០២២ តាមព្រះទីនាំងយន្តហោះពិសេស ឆ្ពោះទៅកាន់ទីក្រុងប៉េកាំង សាធារណរដ្ឋប្រជាមានិតចិន ដើម្បីស្តេចទាំងទ្វេយាងពិនិត្យ និងព្យាបាលព្រះរាជសុខភាពមួយរយៈនៅទីនោះ។

យាងនិងអញ្ជើញថ្វាយព្រះរាជដំណើររបស់ព្រះអង្គទាំងទ្វេ នៅអាកាសយានដ្ឋានអន្តរជាតិភ្នំពេញ មានវត្តមាន សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា សម្ដេចអគ្គមហាពញាចក្រី ហេង សំរិន ប្រធានរដ្ឋសភា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ព្រមទាំងព្រះរាជវង្សានុវង្ស និងមន្ត្រីអ្នកមុខអ្នការជាច្រើនរូប។ ដោយឡែក ឯកឧត្ដម Wang Wentian ឯកអគ្គរដ្ឋទូតចិនប្រចាំកម្ពុជា និងមន្ត្រីស្ថានទូតក៏មានវត្តមានក្នុងឱកាសនោដែរ។ នៅក្នុងព្រះរាជសារផ្ញើជូនជនរួមជាតិ របស់ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា ចុះថ្ងៃទី២៨ ខែកុម្ភៈ ឆ្នាំ២០២២បានគូសបញ្ជាក់ថា «ព្រះអង្គទាំងទ្វេ សូមព្រះអនុញ្ញាត និងអនុញ្ញាតពីសម្ដេចព្រះមហាសង្ឃរាជទាំងពីរគណៈ និងព្រះថេរានុត្ថេរៈគ្រប់ព្រះង្គ សម្ដេច ឯកឧត្ដម លោកជំទាវ អស់លោក លោកស្រី លោកតា លោកយាយ មាមីង បងប្អូន ក្មួយៗ ជនរួមជាតិទាំងអស់ អវត្តមានពីមាតុប្រទេស ចាប់ពីថ្ងៃទី០៤ ខែមីនា ឆ្នាំ២០២២តទៅ ធ្វើដំណើរទៅទីក្រុងប៉េកាំង នៃសាធារណរដ្ឋប្រជាមានិតចិន ដើម្បីពិនិត្យ-ព្យាបាលព្រះរាជសុខភាព។ នៅក្នុងឱកាសអវត្តមានរបស់ព្រះអង្គ សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា នឹងទទួលជួយព្រះអង្គ ក្នុងឋានៈជាប្រមុខរដ្ឋស្ដីទី នៃព្រះរាជាណាចក្រកម្ពុជា»។

គួរបញ្ជាក់ដែរថា នេះគឺជាព្រះរាជដំណើរយាងជាទៀងទាត់រៀងរាល់៦ខែម្ដង របស់ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល ទៅកាន់រាជធានីប៉េកាំង សាធារណរដ្ឋប្រជាមានិតចិន ដើម្បីពិនិត្យ-ព្យាបាលព្រះរាជសុខភាព៕ ដោយ ជឹម ណារី សម្រួលផ្សាយដោយ៖ ធូ កុសល

(សូមអានបន្ត)