ឯកឧត្តម សុខ លូ ជួបពិភាក្សាការងារជាមួយ នាយកសហព័ន្ធសន្តិភាពសកល ប្រចាំតំបន់ឥណ្ឌូចិន

 

បាត់ដំបងោះ ថ្ងៃទី០៤ ខែមីនា ឆ្នាំ២០២២ រសៀលថ្ងៃ១កើត ខែផល្គុន ឆ្នាំឆ្លូវ ត្រីស័ក ព.ស ២៥៦៥ ត្រូវនឹង ថ្ងៃព្រហស្បតិ៍ ទី០៣ ខែមីនា ឆ្នាំ២០២២ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង បានទទួលជួបសម្តែងការគួរសម និងពិភាក្សាការងារជាមួយ លោក ហាជីមិ សៃតុ នាយកសហព័ន្ធសន្តិភាពសកលប្រចាំតំបន់ឥណ្ឌូចិន (UPF) និងសហការី នៅសាលប្រជុំសាលាខេត្តបាត់ដំបង ។

លោក ហាជីមិ សៃតុ នាយកសហព័ន្ធសន្តិភាពសកលប្រចាំតំបន់ឥណ្ឌូចិន បានមានប្រសាសន៍ថា លោករីករាយណាស់ និងសូមថ្លែងអំណរគុណដល់ឯកឧត្តមអភិបាលខេត្ត ដែលបានអនុញ្ញាតឱ្យលោក និងសហការី បានចូលរជួបសម្តែងការគួរសម ។ លោក ក៏បាន កោតសរសើរដល់ប្រទេសកម្ពុជា ក៏ដូចជាខេត្តបាត់ដំបង បានធ្វើការផ្សព្វផ្សាយយ៉ាងទូលំទូលាយក្នុងការចាក់វ៉ាក់សាំងដល់ប្រជាពលរដ្ឋ រួមទាំងលោកមកដល់ពេលនេះ លោកក៏បានទទួលវ៉ាក់សាំងរួចរាល់ហើយដែរ ។

លោក ហាជីមិ សៃតុ ក៏បានជម្រាបជូនបន្ថែមអំពីផែនការ សកម្មភាពការងារដែល UPF នឹងធ្វើបន្ត នៅក្នុងខេត្តបាត់ដំបង។ ដោយមើលឃើញពីស្នាដៃក្នុងការដឹកនាំរបស់ ឯកឧត្តម នៅក្នុងខេត្តបាត់ដំបង សហព័ន្ធសន្តិភាពសកលប្រចាំតំបន់ឥណ្ឌូចិន បានផ្តល់ងារ ឯកឧត្តម សុខ លូ ជាអគ្គរាជទូតសន្តិភាព (Ambassador For Peace) ។

ឯកឧត្តម សុខ លូ អភិបាលខេត្តបាត់ដំបង បានមានប្រសាសន៍ ស្វាគមន៍ និងថ្លែងអំណរគុណដល់អង្គការសហព័ន្ធសន្តិភាពសកល ដែលបានផ្តល់កិត្តិយសមកដល់ឯកឧត្តម ផ្ទាល់ក៏ដូចជារដ្ឋបាលខេត្តបាត់ដំបង ។ ឯកឧត្តម ក៏បានឡើងផងដែរថា កន្លងមកកម្ពុជាយើងធ្លាប់បានឆ្លងកាត់សង្គ្រាមរ៉ាំរ៉ៃយូរអង្វែងណាស់មកហើយ ទើបមកដល់បច្ចុប្បន្ននេះប្រទេសកម្ពុជាយើង ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលជាស្ថាបនិកសន្តិភាពរបស់កម្ពុជា បាននាំមកនូវសន្តិភាពដល់កម្ពុជាយ៉ាងពិតប្រាកដ៕ដោយ ណយ នឿន (ប្រភព:រដ្ឋបាលខេត្តបាត់ដំបង) សម្រួលផ្សាយដោយ៖ ដារា